Қазақстанда интернет негізгі медиақұралға айналды. Еліміздегі медиатұтынудың 64%-ы дәл осы арнаға тиесілі. Бұл туралы K’Research Central Asia зерттеуінде айтылған.
Қазақстандағы медиатұтыну
Зерттеуде айтылғандай күн сайын халықтың 85%-ы интернетке қосылады, ал орта есеппен қазақстандықтар интернетте тәулігіне 4,5 сағат уақыт өткізеді.+ Салыстырмалы түрде айтсақ, теледидар көруге 3 сағат 41 минут, радио тыңдауға — 2 сағаттан сәл артық, ал баспасөзге — шамамен 1 сағат жұмсалады.
Цифрлық контентке бетбұрыс әсіресе жастар арасында айқын байқалады: 15 пен 24 жас аралығындағы қазақстандықтар белсенді түрде видео көреді, әлеуметтік желілерде отырады және онлайн-ойындар ойнайды. Ал аға буын дәстүрлі түрде теледидар мен радиоға басымдық береді.
Соңғы бес жылда интернеттің медиа құрылымындағы үлесі қамту көрсеткішінің сәл өсуі (+2%) мен қолдану уақытының едәуір ұлғаюының (+21 минут) есебінен артқан.
Зерттеу цифрлық ортадағы жоғары фрагментацияны да көрсетеді: қазақстандықтар өз назарын әлеуметтік желілер, онлайн-кинотеатрлар, жаңалықтар сайттары, интернет-дүкендер және стриминг платформалары арасында бөледі. Ең танымал онлайн-әрекеттер — фильм көру, жаңалық оқу және әлеуметтік желілердегі контентті тұтыну.
Мұндай медиакөрініс дәстүрлі форматтардың жылдам аудитория жоғалтып жатқанын көрсетеді. Қазақстандықтарға жол табу үшін олардың смартфонында болу қажет.
Цифрлық сервистер күнделікті өмірдің бөлшегіне айналды
Соңғы жылдары Қазақстанда цифрлық қызметтерді пайдалану едәуір артты. Пайдаланушылардың 40%-дан астамы такси қосымшалар арқылы тапсырыс береді, көбіне демалыс күндері. Yandex Go 74% қамтумен көш бастап тұр, одан кейін InDriver (56%) және Uber (10%) келеді.
Жеткізу қызметтері де жоғары танымалдыққа ие: қазақстандықтардың 34%-ы жеткізуді пайдаланған, олардың 40%-ы ай сайын бірнеше рет тапсырыс береді. Yandex Еда 49% үлеспен көш бастап тұр, Glovo — 46%, ал Wolt — 22%.
Сонымен қатар, ірі қалалардағы халықтың 83%-ы белсенді түрде банктік қызметтерді пайдаланады. Ал сақтандыру мен микроқаржылық қызметтер әлі де төмен сұранысқа ие: ерікті медициналық сақтандыруды тек 6%, МҚҰ қызметтерін — 3% таңдаған.
Электронды сауда Қазақстанда 5 жылда үш есеге артты
Соңғы 5 жыл ішінде Қазақстанның ірі қалаларында e-commerce қолданушылардың үлесі 16%-дан 48%-ға дейін өсті. Онлайн-сатып алушылардың үштен бірі аптасына кемінде бір рет сауда жасайды. Негізгі санаттар — киім (62%), аяқкиім (41%) және азық-түлік (39%). Бұл цифрлық тұтынушылық әдеттердің орныққанын көрсетеді.